 |
| येरमाळा यात्रेत महाप्रसादाचे वाटप |
बार्शी विशेष : श्री क्षेत्र येरमाळा येथे चैत्र पौर्णिमेनिमित्त भरणाऱ्या श्री येडेश्वरी देवीच्या यात्रेत बार्शीतील मंगळवार पेठ येथील श्री येडेश्वरी देवी भक्त मंडळाच्या वतीने भाविकांसाठी मोफत महाप्रसादाचे आयोजन करण्यात आले होते. या उपक्रमांतर्गत हजारो भक्तांना दालचा, मसाला भात आणि बुंदीच्या लाडूचे वाटप करण्यात आले.
सात वर्षांची अखंड परंपरा
मंगळवार पेठ भक्त मंडळाचे हे उपक्रमाचे सातवे वर्ष आहे. दरवर्षीप्रमाणे यंदाही चैत्र यात्रेच्या निमित्ताने हा उपक्रम राबवण्यात आला. समाजातील दानशूर व्यक्तींचा पुढाकार आणि मंडळाच्या सदस्यांनी जमा केलेल्या वर्गणीतून हा महाप्रसाद तयार केला जातो.
"मंडळाच्या वतीने राबवला जाणारा हा सेवाभावी उपक्रम कौतुकास्पद असून, यामुळे यात्रेत येणाऱ्या हजारो भाविकांना महाप्रसादाचा लाभ मिळतो." - उपस्थित भाविक
हजारो भाविकांनी घेतला लाभ
येरमाळा येथे यात्रेनिमित्त राज्याच्या कानाकोपऱ्यातून भाविक येत असतात. कडक उन्हातही या महाप्रसाद वाटपाच्या ठिकाणी भाविकांनी मोठी गर्दी केली होती. मंगळवार पेठ भक्त मंडळाच्या कार्यकर्त्यांनी शिस्तबद्ध पद्धतीने भाविकांना प्रसादाचे वाटप केले.
या उपक्रमासाठी मंडळाचे सर्व पदाधिकारी, कार्यकर्ते आणि सदस्य मोठ्या संख्येने उपस्थित होते. भाविकांनी मंडळाच्या या उपक्रमाबद्दल समाधान व्यक्त करत कार्यकर्त्यांचे आभार मानले.
