आजच्या ठळक घडामोडी | शनिवार दि. ७ मार्च २०२६

 

महाराष्ट्र अर्थसंकल्प २०२६: सोलापूरसाठी महत्त्वाच्या घोषणा | Maharashtra Budget 2026 Solapur News

महाराष्ट्र अर्थसंकल्प: शेतकऱ्यांना दिलासा; २ लाखांपर्यंत कर्जमाफी

बार्शी विशेष : राज्याचे मुख्यमंत्री आणि अर्थमंत्री देवेंद्र फडणवीस यांनी २०२६-२७ या वर्षाचा अंतरिम अर्थसंकल्प सादर केला असून, यात सोलापूर जिल्ह्यासाठी अनेक मोठ्या प्रकल्पांची घोषणा केली आहे. या अर्थसंकल्पाचे सत्ताधारी गटाने स्वागत केले असून विरोधकांनी याला 'आकड्यांचा खेळ' म्हटले आहे.

◥  शेतकऱ्यांना मोठे बळ: २ लाखांपर्यंत कर्जमाफी

'पुण्यश्लोक अहिल्यादेवी होळकर शेतकरी कर्जमाफी योजने'द्वारे ३० सप्टेंबर २०२५ पर्यंतचे २ लाख रुपयांपर्यंतचे पीक कर्ज माफ केले जाणार आहे. तसेच, नियमित कर्ज फेडणाऱ्या शेतकऱ्यांना ५० हजार रुपयांचे प्रोत्साहनपर अनुदान दिले जाईल. सोलापूर जिल्हा मध्यवर्ती बँकेच्या (DCC) सुमारे १ लाख शेतकऱ्यांना याचा थेट लाभ मिळणार आहे.

सोलापूर जिल्ह्यासाठी काय?

◥  वैमानिक प्रशिक्षण (FTO): सोलापूर विमानतळावर 'फ्लाइंग ट्रेनिंग ऑर्गनायझेशन' स्थापन होणार असून, यामुळे स्थानिक तरुणांना पायलट बनण्याची संधी मिळेल.

◥ पंढरपूर विकास: पंढरपूर-मंगळवेढा मतदारसंघातील रिंग रोड, उड्डाणपूल आणि उपसा सिंचन योजनांसाठी ५०१.१६ कोटींची तरतूद.

◥  दक्षिण सोलापूर एग्री मॉल: दक्षिण सोलापूर मतदारसंघात आधुनिक कृषी भवन आणि 'एग्री मॉल' उभारण्यास मंजुरी.

◥ अजित पवार स्मृती: दिवंगत उपमुख्यमंत्री अजित पवार यांच्या स्मृतीप्रित्यर्थ राज्यात भव्य स्मारक आणि त्यांच्या नावाने 'गतिमान नागरी सेवा पुरस्कार' देण्याची घोषणा मुख्यमंत्री फडणवीस यांनी केली.

इतर काही स्थानिक घडामोडी

◥ अहिल्यारत्न पुरस्कार: पुण्यश्लोक अहिल्यादेवी होळकर सोलापूर विद्यापीठातर्फे ज्येष्ठ समाजसेविका डॉ. मंदाकिनी आमटे यांना 'अहिल्यारत्न पुरस्कार' प्रदान करण्यात आला. ५१ हजार रुपये आणि सन्मानचिन्ह असे या पुरस्काराचे स्वरूप होते.

◥ स्थायी समिती सभापती: सोलापूर महानगरपालिकेच्या स्थायी समिती सभापतीपदी रंजिता चाकोते यांची बिनविरोध निवड झाली आहे.

◥ कामचुकार कर्मचाऱ्यांवर कारवाई: तक्रारींची दखल न घेणाऱ्या महापालिकेच्या १०० कर्मचाऱ्यांवर दंडात्मक कारवाई करण्यात आली असून ३७,७०० रुपयांचा दंड वसूल करण्यात आला.

◥ साखर कारखाना गाळप: कुमठे येथील श्री सिद्धेश्वर सहकारी साखर कारखान्याचा गळीत हंगाम यशस्वीरीत्या संपन्न झाला. यंदा कारखान्याने ५,६५,५७१ मेट्रिक टन गाळप करून ६,२०,१०० क्विंटल साखरेचे उत्पादन केले.

स्त्रोत : सोलापूर आकाशवाणी